Sri Srinivasa Taravali
śrīvēṅkaṭēśaṁ lakṣmīśamaniṣṭaghnamabhīṣṭadam |
caturmukhākhyatanayaṁ śrīnivāsaṁ bhajē:’niśam || 1 ||
yadapāṅgalavēnaiva brahmādyāḥ svapadaṁ yayuḥ |
mahārājādhirājaṁ taṁ śrīnivāsaṁ bhajē:’niśam || 2 ||
anantavēdasaṁvēdyaṁ nirdōṣaṁ guṇasāgaram |
atīndriyaṁ nityamuktaṁ śrīnivāsaṁ bhajē:’niśam || 3 ||
smaraṇātsarvapāpaghnaṁ stavanādiṣṭavarṣiṇam |
darśanāt muktidaṁ cēśaṁ śrīnivāsaṁ bhajē:’niśam || 4 ||
aśēṣaśayanaṁ śēṣaśayanaṁ śēṣaśāyinam |
śēṣādrīśamaśēṣaṁ ca śrīnivāsaṁ bhajē:’niśam || 5 ||
bhaktānugrāhakaṁ viṣṇuṁ suśāntaṁ garuḍadhvajam |
prasannavaktranayanaṁ śrīnivāsaṁ bhajē:’niśam || 6 ||
bhaktabhaktisupāśēnabaddhasatpādapaṅkajam |
sanakādidhyānagamyaṁ śrīnivāsaṁ bhajē:’niśam || 7 ||
gaṅgāditīrthajanakapādapadmaṁ sutārakam |
śaṅkhacakrā:’bhayavaraṁ śrīnivāsaṁ bhajē:’niśam || 8 ||
suvarṇamukhitīrasthaṁ suvarṇēḍyaṁ suvarṇadam |
suvarṇābhaṁ suvarṇāṅgaṁ śrīnivāsaṁ bhajē:’niśam || 9 ||
śrīvatsavakṣasaṁ śrīśaṁ śrīlōlaṁ śrīkaragraham |
śrīmantaṁ śrīnidhiṁ śrīḍyaṁ śrīnivāsaṁ bhajē:’niśam || 10 ||
vaikuṇṭhavāsaṁ vaikuṇṭhatyāgaṁ vaikuṇṭhasōdaram |
vaikuṇṭhadaṁ vikuṇṭhājaṁ śrīnivāsaṁ bhajē:’niśam || 11 ||
(daśāvatārastutiḥ)
vēdōddhāraṁ matsyarūpaṁ svacchākāraṁ yadr̥cchayā |
satyavratōddhāraṁ satyaṁ śrīnivāsaṁ bhajē:’niśam || 12 ||
mahāgādha jalādhāraṁ kacchapaṁ mandarōddharam |
sundarāṅgaṁ ca gōvindaṁ śrīnivāsaṁ bhajē:’niśam || 13 ||
varaṁ śvētavarāhākhyaṁ saṁhāraṁ dharaṇīdharam |
svadaṁṣṭrābhyāṁ dharōddhāraṁ śrīnivāsaṁ bhajē:’niśam || 14 ||
prahlādāhlādakaṁ lakṣmīnr̥siṁhaṁ bhaktavatsalam |
daityamattēbhadamanaṁ śrīnivāsaṁ bhajē:’niśam || 15 ||
( namastē vāsudēvāya namaḥ saṅkarṣaṇāya ca |
vāmanāya namastubhyaṁ śrīnivāsa svarūpiṇē || )
vāmanaṁ vāmanaṁ pūrṇakāmaṁ bhānavamāṇavam |
māyinaṁ balisaṁmōhaṁ śrīnivāsaṁ bhajē:’niśam || 16 ||
candrānanaṁ kundadantaṁ kurājaghnaṁ kuṭhāriṇam |
sukumāraṁ bhr̥gur̥ṣēḥ śrīnivāsaṁ bhajē:’niśam || 17 ||
śrīrāmaṁ daśadigvyāptaṁ daśēndriyaniyāmakam |
daśāsyaghnaṁ dāśarathiṁ śrīnivāsaṁ bhajē:’niśam || 18 ||
gōvardhanōddharaṁ bālaṁ vāsudēvaṁ yadūttamam |
dēvakītanayaṁ kr̥ṣṇaṁ śrīnivāsaṁ bhajē:’niśam || 19 ||
nandanandanamānandaṁ indranīlaṁ nirañjanam |
śrīyaśōdāyaśōdaṁ ca śrīnivāsaṁ bhajē:’niśam || 20 ||
gōbr̥ndāvanagaṁ br̥ndāvanagaṁ gōkulādhipam |
urugāyaṁ jaganmōhaṁ śrīnivāsaṁ bhajē:’niśam || 21 ||
pārijātaharaṁ pāpaharaṁ gōpīmanōharam |
gōpīvastraharaṁ gōpaṁ śrīnivāsaṁ bhajē:’niśam || 22 ||
kaṁsāntakaṁ śaṁsanīyaṁ saśāntaṁ saṁsr̥ticchidam |
saṁśayacchēdisaṁvēdyaṁ śrīnivāsaṁ bhajē:’niśam || 23 ||
kr̥ṣṇāpatiṁ kr̥ṣṇaguruṁ kr̥ṣṇāmitramabhīṣṭadam |
kr̥ṣṇātmakaṁ kr̥ṣṇasakhaṁ śrīnivāsaṁ bhajē:’niśam || 24 ||
kr̥ṣṇā:’himardanaṁ gōpaiḥ kr̥ṣṇōpavanalōlupam |
kr̥ṣṇātātaṁ mahōtkr̥ṣṭaṁ śrīnivāsaṁ bhajē:’niśam || 25 ||
buddhaṁ subōdhaṁ durbōdhaṁ bōdhātmānaṁ budhapriyam |
vibudhēśaṁ budhairbōdhyaṁ śrīnivāsaṁ bhajē:’niśam || 26 ||
kalkinaṁ turagārūḍhaṁ kalikalmaṣanāśanam |
kalyāṇadaṁ kalighnaṁ ca śrīnivāsaṁ bhajē:’niśam || 27 ||
śrīvēṅkaṭēśaṁ matsvāmin jñānānanda dayānidhē |
bhaktavatsala bhō viśvakuṭumbinnadhunā:’va mām || 28 ||
ananta vēdasaṁvēdya lakṣmīnāthāṇḍakāraṇa |
jñānānandaiśvaryapūrṇa namastē karuṇākara || 29 ||
iti śrī dēvaśarma kr̥ta śrī śrīnivāsa tārāvalī |
